Сўнгги маълумотларга кўра, АҚШ президенти Дональд Трамп ва Украина президенти Владимир Зеленский ўртасида бўлиб ўтган суҳбатда Трамп, “Нега ҳали ҳам Москва ва Санкт-Петербургга зарба бермадингиз?” деган саволни берган. Зеленский эса, “Агар қурол берсангиз, зарба берамиз”, деб жавоб берган. Бу ҳақда The Washington Post нашри хабар берди.
Трамп мазкур суҳбат давомида Украинадан Россиянинг икки йирик шаҳрига нисбатан босимни кучайтиришни истаганини билдирган. Нашр ёзишича, АҚШ Украинага илгари етказилган ATACMS ракеталарини тўлиқ масофада (300 км гача) қўллашга рухсат беришни кўриб чиқмоқда. Бу орқали Украина Россия ҳудудидаги стратегик ҳарбий объектларга зарба бера олади. Шунингдек, Tomahawk ракеталарини етказиш имконияти ҳам муҳокамада бўлиб, улар билан Москва ва Петербургни нишонга олиш мумкин бўлади.
Газетанинг таҳлилига кўра, Трампнинг Россияга нисбатан позициясини кескинлаштириши бир нечта сабаблар билан боғлиқ: Путиннинг сулҳга нисбатан лоқайдлиги, АҚШнинг Эронга муваффақиятли зарбалари ва Трампнинг Кремль фақат кучни тан олади, деган ишончи.
Зеленский Трамп билан НАТО бош котиби Марк Рютте иштирокида бўлиб ўтган учрашувда АҚШдан Patriot ракета тизимларини олиш бўйича келишувдан мамнунини билдириб, Вашингтоннинг ҳарбий ёрдамни кучайтириш ниятини юқори баҳолади. Трамп, шунингдек, Россияга қарши 50 кунлик муҳлат қўйиб, агар шу муддат ичида сулҳ бўлмаса, 100 фоизлик бож ва санкциялар жорий этилишини маълум қилган.
Шунингдек, Зеленский АҚШ президенти вакили Кит Келлог билан ҳам учрашиб, қурол-яроғ ишлаб чиқаришдаги ҳамкорлик, ПВО тизимини ривожлантириш ва Россияни қўллаб-қувватловчи давлатларга нисбатан санкцияларни муҳокама қилган.