Зеленский: "Украина Европа Иттифоқининг тўлиқ аъзоси бўлиши керак"

Украина ҳеч қандай чекловларсиз Европа Иттифоқининг тўлиқ аъзоси бўлиши керак.

Бу ҳақда Украина президенти Владимир Зеленский Европанинг кенгайиш бўйича саммити иштирокчиларига мурожаатида маълум қилган.

"Мен Украинага тенглар орасида тенг муносабатда бўлиши жуда муҳим, деб ҳисоблайман. Ва агар биз ЕИга аъзолик ҳақида гапирадиган бўлсак, у тўлиқ бўлиши керак. Менимча, тенг ҳуқуқли давлатлар, уларнинг катталиги ва аҳолисидан қатъи назар, бир столда ўтириши жуда муҳим", - деди у.

Унинг таъкидлашича, ЕИга аъзолик ҳақида гап кетганда, барча мамлакатлар умумий қадриятларга эга бўлиши жуда муҳим: "Менимча, Европа Иттифоқига ярим аъзолик ёки қисман аъзолик бўлиши мумкин эмас".

Аввалроқ Европа Иттифоқининг кенгайиш бўйича комиссари Марта Кос Европа Иттифоқига аъзо бўлган янги давлатларга бир неча йиллик "синов муддати" берилиши ва улар демократик тамойиллардан четга чиқса, улар чиқариб юборилиши мумкинлигини айтган эди.