Зеленский Трампни жойига ўтирғизиб қўйди

Украина президенти Владимир Зеленский АҚШ президенти Доналд Трамп ва витсе-президент Жей Ди Венс билан кучли тортишув содир бўлганидан сўнг Оқ уйни муддатидан олдин тарк этмоқда. Бу ҳақда Reuters хабар бермоқда.

Трампнинг Truth Social тармоғидаги баёноти ҳам буни тасдиқлайди. "Бугун Оқ уйда ғоят муҳим учрашув ўтказдик. Биз бундай шароит ва босим остидаги суҳбатсиз тушуниб бўлмайдиган кўп нарсаларни англаб етдик. Ҳайратланарлиси шундаки, ҳис-туйғулар орқали қандай нарсалар юзага чиқади, ва мен шундай хулосага келдимки, президент Зеленский, агар Америка иштирок этса, тинчликка тайёр эмас, чунки у бизнинг иштирокимиз унга музокараларда катта устунлик беради деб ҳисоблайди. Мен устунликни эмас, ТИНЧЛИКни хоҳлайман. У муқаддас Овал кабинетида Америка Қўшма Штатларига ҳурматсизлик кўрсатди. У тинчликка тайёр бўлганда қайтиши мумкин," дея таъкидланган Трампнинг хабарида.

Шунингдек, Зеленский ва Трамп ўртасидаги музокаралардан сўнг ўтказилиши мўлжалланган қўшма матбуот анжумани ҳам бекор қилинди. Ташриф чоғида имзоланиши режалаштирилган фойдали қазилмалар бўйича келишувнинг тақдири ҳозирча номаълум қолмоқда.

Fox News хабар беришича, Оқ уйдаги оммавий тортишувдан кейин Трамп Зеленскийдан кетишини сўраган. Fox News телеканали маълум қилишича, "АҚШ ва Украина ўртасида камёб ер элементлари бўйича битим имзоланиши бекор қилинди".