Немислар рус газини талаб қилмоқда

Bloomberg: Германия корхоналари уруш тугаганидан сўнг Россия гази импортини тиклашга чақирмоқда.

Агентликнинг ёзишича, Германия саноати Россиянинг арзон гази асосида қурилган. Энергия нархларининг ошиши эса иқтисодий ўсишнинг секинлашишига олиб келди ва айрим ишлаб чиқарувчиларни хорижга кўчиб ўтишга мажбур қилди.

"Агар биз Украинада тинчликка эришсак ва Россиянинг Европага таҳдид солмаслигига ишонч пайдо бўлса, келажакда Россия газини етказиб беришни муҳокама қилишга очиқ бўлишимиз керак. Менимча, газ етказиб беришни абадий тақиқлаб қўйиш тўғри бўлмайди", — дея фикр билдирди Германиянинг Саксония-Анхалт федерал ери иқтисодиёт вазири Свен Шулце.

Bloomberg'нинг қайд этишича, газ харид қилиш ҳақидаги қарорни мамлакат етакчилари қабул қилади. Бу сиёсий жиҳатдан қабул қилиш мураккаб қарор бўлиши мумкин.

Германияга Россия газини етказиб беришнинг эҳтимолий йўллари қаторида Украина орқали транзитни тиклаш ёки “Шимолий оқим” қувурининг шикастланмаган қисмидан фойдаланиш имконияти мавжуд. Ҳозирча Европа Иттифоқи Россиядан суюлтирилган табиий газ импортини кўпайтирмоқда.