Зеленский сайловга тайёргарлик кўришни буюрдими?

“Халқ хизматчиси” фракцияси раҳбари Зеленский сайловга тайёргарлик кўришни буюргани ҳақидаги хабарни инкор этди.

Аввалроқ The Economist нашри ўтган ҳафта Украина президенти Владимир Зеленский йиғилиш ўтказиб, ўз жамоасига тўлиқ ўт очишни тўхтатишга эришилгандан сўнг сайловларни ташкил этишни топширганини хабар қилган эди.

АҚШ томонининг баҳосига кўра, бу ҳолат апрел ойининг охирида юз бериши мумкин. Нашрнинг таъкидлашича, Украинада ҳарбий ҳолатни бекор қилиш сайлов жараёнини бошлаш учун зарур бўлган биринчи босқич ҳисобланади. Қонунга кўра, сайловолди ташвиқоти камида 60 кун давом этиши лозим, шунинг учун энг эрта сайлов ўтказиш имконияти июл ойи бошига тўғри келади.

"Мен нафақат бундай йиғилишда қатнашмаганимни, балки умуман бундай йиғилиш бўлмаганини ҳам тасдиқлайман. Ҳеч қандай сайловга тайёрланмаяпмиз. Олий Рададаги барча партия ва фракциялар сайловлар ҳарбий ҳолат бекор қилинганидан олти ой ўтиб ўтказилиши кераклиги бўйича келишиб олган. Бу борадаги позитциямиз ўзгармаган", — дея изоҳ берди “Халқ хизматчиси” фракцияси раҳбари Давид Арахамия “Суспильне” нашрига.