Аргентинадаги инаугурация маросими олдидан Зеленский Франция президенти Эммануэль Макрон билан телефон орқали мулоқот қилди.
“Эммануэлни фронтдаги воқеалар ҳақида хабардор қилдим ва унга Франция томонидан кўрсатилган ҳарбий ёрдам учун миннатдорчилик билдирдим. Биз устувор эҳтиёжларимизни ва Украинанинг жанговар қудратини сезиларли даражада мустаҳкамлаган Франциянинг навбатдаги мудофаа пакетини муҳокама қилдик”, деб ёзди Зеленский ўзининг Телеграм-каналида.
Зеленский, шунингдек, Макронга F-16 ўқув дастурининг иккинчи босқичи доирасида украиналик учувчиларни қабул қилишга тайёрлиги учун миннатдорчилик билдирди. Сентябрь ойи бошида Зеленский Макрон билан украиналик учувчиларни Францияда қирувчи самолётларни бошқаришга ўқитишни бошлаш бўйича келишувга эришганини эълон қилган эди. Украиналик учувчиларни тайёрлаш АҚШда ҳам тасдиқланган. АҚШ Мудофаа вазирлиги учувчиларни F-16 ни бошқариш учун ўқитиш муддати беш ойдан тўққиз ойгача давом этишини таъкидлади.
Зеленский Украинанинг Европа Иттифоқига қўшилиши бўйича музокаралар муҳимлигини таъкидлади. “Украина Европа комиссиясининг барча зарур тавсияларини бажарди. Европа кенгаши қарори Украина жамияти ва армиясининг мотивациясига сезиларли таъсир кўрсатади”, дея қўшимча қилди у.