Зеленский: Биз бу урушни АҚШсиз тугатиш йўлини қидирмаяпмиз

Украина президенти Владимир Зеленский Россия президенти Владимир Путинни тўхтатиш ва урушни АҚШсиз тугатиш йўлини излаётгани йўқлигини билдирди.

“Биз бу урушни АҚШсиз тугатиш йўлини қидирмаяпмиз. Биз биргаликда қатъий қадамлар ташлаймиз. Путин бизни бўлиб, кучсизлантирмоқчи”, — деди Зеленский Лондонда бўлиб ўтган “Иродалар коалицияси” йиғилишида.

Учрашувда Британия бош вазири Кей Стармер, НАТО бош котиби Марк Рютте, Дания бош вазири Метте Фредериксен ва Голландия бош вазири Дик Шофф ҳам иштирок этди.

Зеленский ўз нутқида Россия Украина энергетика тизимига қарши “террорчилик кампанияси” олиб бораётганини, тинч аҳолини “соғуқ қишга чидам беришга мажбурлаётганини” таъкидлади.

“Улар бизни йўқ қилмоқчи. Украина йўқ бўлишини исташмоқда ва бу мақсадга эришиш учун қўлларидан келганини қилмоқдалар”, — деди Украина раҳбари.

Президент мамлакатнинг ҳаво ҳужумидан мудофаа тизимини мустаҳкамлаш ва фронт чизиғига эътиборни кучайтириш зарурлигини қайд этди.

Шунингдек, Зеленский Россия нефтига қарши санкцияларни “катта қадам” деб атади ва бу чораларни жорий этгани учун АҚШ президенти Дональд Трамп ҳамда бошқа иттифоқчиларига миннатдорлик изҳор қилди.

Унинг таъкидлашича, санкциялар Россияни урушни тугатишга мажбур этишда ҳал қилувчи аҳамиятга эга бўлиб қолмоқда.

Зеленский Россия расмийларининг санкциялар иқтисодиётга таъсир қилмаётгани ҳақидаги даъволарини рад этди. Унинг сўзларига кўра, Россияда ёқилғи қуйиш шохобчаларида навбатлар сақланиб қолмоқда, банкротлик ҳолатлари кўпаймоқда ва федерал бюджет танқислиги ортиб бормоқда.

“Тинчлик фақат тажовузкорга кўрсатилаётган босим орқали юзага келади. Биз бу босимни давом эттиришимиз керак”, — деди Зеленский.

Шу билан бирга, Украина раҳбари Европа кенгашининг музлатилган Россия активларидан Украинага ёрдам учун фойдаланиш тўғрисидаги қарорини олқишлади ва бу йил охиригача амалга ошишидан умид билдирди.

“Музлатилган активлар масаласида уч босқич бор: сиёсий қарор, амалий ечим ва сўнг — амалга ошириш. Кеча биз сиёсий қарорни қабул қилдик, деб ўйлайман. Бу ижобий сигнал”, — деди Зеленский.