Зеленский АҚШ президенти махсус вакилининг тинчлик келишувига “бешта ҳудуд” масаласи ҳам киритилиши ҳақидаги сўзларига изоҳ берди

"Биз учун “қизил чизиқлар” бу — рус қўшинлари томонидан босиб олинган ҳудудларимизнинг “Россияга тегишли” деб тан олиниши ҳисобланади. АҚШ президентининг махсус вакили Стив Уиткофф ўз ваколат доирасидан ташқаридаги масалаларни муҳокама қилмоқда", — дея таъкидлади Украина президенти Володимир Зеленский Одессага ташриф буюрган NATO бош котиби Марк Рютте билан бўлиб ўтган матбуот анжуманида.

Зеленский, шунингдек, АҚШ билан фойдали қазилмалар бўйича олиб борилаётган келишув музокараларини ҳам изоҳлади. Президент жараён "ижобий шаклда" давом этаётганини қайд этди.

"14 апрел куни техник гуруҳларнинг учрашуви ўтказилди ва бундай даражадаги учрашувлар ҳам онлайн, ҳам офлайн шаклда бутун ҳафта давомида давом этади. Барча муҳокамалардан сўнг, жамоалар қандай келишув лойиҳаси ишлаб чиққанини кўрсатади", — дея изоҳ берди Украина президенти.

Аввалроқ АҚШ президентининг махсус вакили Стив Уиткофф Россия ва Украина ўртасида “тинчлик келишуви”га эришиш бўйича ишлар давом этаётганини айтган эди. Унга кўра, бу келишув "беш ҳудуд устидан назорат"ни ҳам ўз ичига олади, бироқ у айнан қайси ҳудудлар ҳақида гап кетаётганини очиқламаганди.

Reuters агентлиги хабарига кўра, Уиткофф Трампга Украинада ўт очишни тўхтатишнинг энг тезкор йўли — 2022 йилда Россия томонидан аннекция қилинган Украинанинг тўрт ҳудуди устидан назоратни Москвага бериш эканини билдирган.

Путин тинчлик келишувига эришиш учун Донецк, Луганск, Херсон ва Запорже вилоятларидан Украина қўшинлари чиқарилишини талаб қилган. Бундан ташқари, Россия 2014 йилдан буён Қримни ўз ҳудуди деб ҳисоблайди. Украина Москванинг ҳеч қайси ҳудудий даъволарини тан олмайди.