Ҳаётингизда олис манзилга йўлга отланиб, сафар чиптасини харид қилгансиз-у, кетишингизга оз фурсатлар қолганда муаммо юз берса... Самарқандлик М. Сейдамедовнинг бошидан ўтганлари билан танишинг. Унга Авиакасса ходими қўнғироқ қилиб, Москва шаҳрига кетиш учун сотиб олган авиачипталарини зудлик билан қайтариш кераклигини, чипта билан боғлиқ муаммо чиққанлигини таъкидлади. Ўғли билан етиб боришсаки, қўшимча тўлов қилиши кераклигини, йўқса Москвага учиб кетолмаслигини таъкидлашди. Бунга эътироз билдирган фуқарога аччиқ устида авиакасса ходими чиптани йиртиб ташлайди. Бундай ноқулай вазиятда зудликда чора кўрмаса, ўғли ўқишига вақтида етиб боролмаслигини англаган М.Сейдамедов Истеъмолчилар ҳуқуқларини ҳимоя қилиш Самарқанд шаҳар жамиятига мурожаат этди.
Мурожаатнинг қисқача мазмуни шундай – фуқаро Самарқанд шаҳридаги Мармар бозори ҳудудида жойлашган авиакассадан 1 325 000 (1 млн. уч юз йигирма беш минг) сўмга Самарқанд-Москва йўналиши бўйича учувчи самолётга чипта харид қилади. Уч кундан сўнг авиакассага чақиртирилиб, яна салкам 2 000 000 (икки млн) сўм тўлаши зарурлигини айтадилар. Рози бўлмагач, чиптани кўз ўнгида йиртиб ташлашади. Мурожаат ўрганилганда, касса ходимининг ўз ишига совуққонлиги, иш пайтида ўрнини бегона, мутахассис бўлмаган кишига ташлаб кетганлиги, Самарқанд-Москва йўналиши бўйича чипта нархи ҳақиқитан 3 200 000 (уч млн. Икки юз минг) сўм эканлиги маълум бўлди. Фуқаронинг ҳуқуқи тиклаб берилди. Авиакасса томонидан ходимининг хатоси туфайли юз берган хатолик бартараф этилиб, М.Сейдамедовга мазкур йўналиш бўйича қўшимча тўловларсиз чипта тақдим этилди.
Manba: xs. uz
