Янги ўқув йилидан мактабларда математика, кимё ва биология фанлари чуқурроқ ўргатилади

Президентнинг 2020 йил 24 январда Олий Мажлисга мурожаатномаси ҳамда 2020 йил 31 январь куни математика, кимё, биология ва геология илм-фанини ривожлантиришга бағишланган йиғилишида илм-фаннинг устувор йўналишлари сифатида математика, кимё, биология ва геология соҳалари белгиланди.

Халқ таълими вазирлиги томонидан 2020-2021 ўқув йилидан бошлаб математика, кимё ва биология фанларини чуқурроқ ўргатиш учун мазкур фанларга қўшимча дарс соатлари ажратилди. 

Вазирлик хабарига кўра, жумладан:

• 10-синф “Математика” фанига ҳафтасига 1 соат;
• 10-11-синф “Кимё” фанига ҳафтасига 1 соатдан (жами 2 соат);
• 10-11-синф “Биология” фанига ҳафтасига 1 соатдан (жами 2 соат).

Шунингдек, 2020 йил “Илм, маърифат ва рақамли иқтисодиётни ривожлантириш йили”да мамлакатимизда таълимнинг барча босқичларида халқаро андозаларга тўлиқ жавоб берадиган ахборот технологиялари жорий этилиши муносабати билан 5-6-синфларда “Информатика ва ахборот технологиялари” фанига ҳафтасига 0,5 соатдан (жами 1 соат) қўшиб берилди.

Эндиликда, халқ таълими тизимида 2020-2021 ўқув йилидан бошлаб:

• математика фани ҳафтасига 55 соат (ўтган йилда 54 соат);
• кимё фани ҳафтасига 12 соат (ўтган йилда 10 соат);
• биология фани ҳафтасига 15 соат (ўтган йилда 13 соат);
• информатика фани ҳафтасига 10 соат ўқитилади (ўтган йилда 9 соат).