Ямал: «Испанияда ирқчиликка минг марта дуч келганман»

«Барселона» ҳужумчиси Ламин Ямал Испанияда кўп бор ирқчилик ҳолатларига дуч келганини айтди.

«Ҳа, минг марта. Одамлар баъзан сизга нисбатан билвосита ирқчилик қилади ва ҳатто ўзлари ҳам буни англамайди. Ирқчиликка оид кўплаб изоҳлар, қарашлар ва вазиятлар бўлади, аммо одамлар буни тушунмайди.

Мен шундай муҳитда улғайганманки, буни оддий ҳолат деб бўлмайди, чунки нотўғри нарсани нормал деб қабул қилиб бўлмайди. Аммо шу билан бирга, бу нарсалар мени қаттиқ безовта қилмайди.

Масалан, «Бернабеу»да мен ва Рафиньяга турли гаплар бақирилган машҳур видео бор. Одамлар менинг реакциямдан ҳайрон қолишганди. Ахир кимдир мени қора танли деб атаса, бу мени умуман хафа қилмайди. Мен қора танлиман, бошқа рангда эмасман.

Бошқа масала — бу сўзнинг қандай маънода айтилаётгани. Агар у камситиш мақсадида айтилса, бу нотўғри. Аммо мен футбол ўйнаётганда, мени томоша қилиш учун чипта сотиб олиб, кейин менга ҳурматсизлик қилган одам туфайли жаҳлим чиқишига йўл қўймайман», — дея Ямалнинг сўзларини Mundo Deportivo келтирди.

19 ёшли испаниялик футболчи 2024 йил 26 октябрда «Реал»га қарши «Сантьяго Бернабеу» стадионида ўтказилган учрашувдаги воқеани ҳам эслади. Ўша баҳсда Ямал ва Рафинья голни нишонлаётган пайтда трибуналардан ирқчилик ва ксенофобия мазмунидаги ҳақоратли ҳайқириқлар эшитилган эди.