Холанд яна Англияда тенгсиз

ESPN хабарига кўра, «Манчестер Сити» ҳужумчиси Эрлинг Холанд фаолиятида учинчи бор Премьер-лиганинг «Олтин бутса»сини қўлга киритди.

Норвегиялик футболчи 2025/26 йилги мавсумни Англия чемпионатида 27 та гол билан якунлаб, иккинчи ўринни эгаллаган «Брентфорд» вакили Игор Тиагони (22 гол) бешта гол фарқи билан ортда қолдирди.

25 ёшли Холанд шунингдек, 2022/23 (36 та гол) ва 2023/24 (27 та гол) мавсумларида ҳам лиганинг энг яхши тўпурари бўлган эди. Унинг «Сити»даги жамоадоши Антуан Семеньо эса мавсумни «Борнмут»да бошлаб, қишки трансфер ойнасида «Манчестер Сити»га ўтган ва жами 17 та гол киритган.

«Астон Вилла» ҳужумчиси Олли Уоткинс эса 38-турда «Сити»га қарши кечган баҳсда (2:1) дубл қайд этиб, 16 та гол билан энг яхши инглиз тўпурари мақомига эришди.

Маълумот учун, фақат Тьерри Анри ва Муҳаммад Салоҳгина (ҳар бири 4 мартадан) Холанддан кўпроқ (3 марта) «Олтин бутса» ютган. Салоҳнинг «Ливерпуль»ни тарк этишини ҳисобга олсак, Холанд аллақачон Алан Ширер ва Ҳарри Кейн билан тенглашиб олди (ҳар бирида 3 тадан соврин).

Норвегиялик форвард ҳисобида Премьер-лигадаги 132 та ўйинда 112 та гол мавжуд. У АПЛда 100 та гол маррасини энг тез забт этган футболчи ҳисобланади – унга бунинг учун атиги 111 та ўйин керак бўлди (Ширернинг аввалги рекордидан 13 та ўйинга тезроқ).