Хитой Тайванга қарши эҳтимолий ҳарбий операцияни қўллаб-қувватлашга қодир йирик фуқаролик флотини сафарбар қилмоқда

Хитой Тайванга қарши эҳтимолий ҳарбий операцияни қўллаб-қувватлашга қодир йирик фуқаролик флотини сафарбар қилмоқда — Reuters.

Агентлик кемалар ҳаракати бўйича кузатув маълумотлари ва сунъий йўлдош тасвирларини ўрганиб, тайёргарлик кўлами Иккинчи жаҳон урушидаги “Нормандия операцияси”дан ҳам ошиши мумкин, деган хулосага келган.

Журналистлар ёзги ҳарбий машғулотларда иштирок этган юздан ортиқ фуқаролик кемаларининг ҳаракатини таҳлил қилган. Жорий йилнинг 17 август куни содир бўлган бир эпизодда 12 та кема – паромлар ва юк кемалари Гуандун провинцияси қирғоқларига йўл олиб, техникани тўғридан тўғри қирғоққа тушира бошлаган. Хитой халқ озодлик армиясининг машғулотлари чоғида юк кемаларидан оғир ҳарбий техникани шундай усулда тушириш илк бор ҳужжатлаштирилган.

Денгиз операциялари бўйича экспертлар баҳосига кўра, Хитойнинг ҳаракатлари босқин сценарийларининг аниқ ишланаётганини кўрсатади. Техникани тушириш учун фуқаролик юк кемаларидан фойдаланиш Хитойнинг қирғоқда тезкор тарзда куч жойлаштириш имкониятларини сезиларли кенгайтиради.