Хитой давлат компанияси Россиядаги «Герань» дронлари учун хомашё етказиб берган — Politico ва The Telegraph

Хитойнинг давлатга қарашли Jilin Chemical Fiber Group компанияси Россияга углерод толаси ишлаб чиқаришда қўлланиладиган 46 тонна полиакрилонитрил етказиб берган. Юк «Росатом»нинг «Алабуга-Волокно» корхонасига юборилган.

Текширувга кўра, етказиб бериш ҳужжатларида юк фуқаролик мақсадидаги синтетик тола учун мўлжалланган божхона коди билан расмийлаштирилган. Углерод толаси эса Россиянинг Эроннинг «Шаҳед» конструкцияси асосида яратилган «Герань» зарбали дронларида қўлланади.

Мутахассислар ҳисоб-китобига кўра, ушбу партия хомашёдан камида 1 300 та дрон ишлаб чиқариш мумкин. Ҳужжатларнинг ҳақиқийлиги Украина ҳукумати ва АҚШ Конгресси Вакиллар палатасининг Хитой бўйича махсус қўмитаси томонидан тасдиқлангани айтилмоқда.

Пекин эса Россияга қурол етказиб беришини рад этиб, икки мақсадли маҳсулотлар экспортини қатъий назорат қилишини таъкидлаб келади.