Винисиус учта ўйинга четлатилиши мумкин

Мадриднинг "Реал" клуби бразилиялик ҳужумчиси Винисиус Жуниор катта эҳтимол билан "Барселона"га қарши учрашувда жамоасига ёрдам бера олмайди.

Журналист Марио Кортегананинг хабар беришича, Винисиус Испания чемпионатининг 8-турида "Вильярреал"га қарши ўйинда (1:0) майдондан четлатилгани учун камида иккита учрашувга дисквалификация қилинади.

Бироқ бразилиялик футболчининг қизил карточкага нисбатан тажовузкор муносабати сабабли жазо муддати учта ўйингача оширилиши мумкин. Эслатиб ўтамиз, Винисиус рақибининг сочидан тортгани учун майдондан четлатилган эди.

Катта эҳтимол билан Винисиус "Барселона"га қарши баҳсни ўтказиб юборади. "Реал" Каталония клуби билан "Севилья"га қарши уй учрашувидан кейинги турда тўқнаш келади.

14 октябрь куни "қаймоқранглилар" Чемпионлар лигаси умумий босқичи 2-турида сафарда Италиянинг "Рома" клубига қарши майдонга тушади.