АҚШда Криста Пайк қайта қатл этиладими?

Америкалик Криста Пайк пентобарбитал ўлим инъекциясидан кейин омон қолган АҚШ тарихидаги биринчи инсонга айланганидан сўнг, қайта қатл этилиши мумкин.

Бу ҳақда россиялик халқаро ҳуқуқшунос Михаил Ажгиревич маълум қилди.

Аёл ҳозирда қамоқхонада соғлиғини тиклаш жараёнидан ўтмоқда. Маълум бўлишича, томирлардаги муаммолар туфайли препарат қўл тўқималарида тўпланиб қолган ва таъсир қилмаган.

Экспертнинг таъкидлашича, Теннесси штатида қайта қатл қилиш ҳуқуқий жиҳатдан мумкин, бироқ бу энг камида 2027 йилдан олдин содир бўлмайди. Америка амалиётида бундай муқаддам кузатилган ҳолат (прецедент) мавжуд: 1947 йилда Уилли Фрэнсис электр стулда омон қолган эди. Ўшанда АҚШ Олий суди ҳукмнинг иккинчи марта ижро этилиши жараён иштирокчиларининг ҳуқуқларини бузмаслиги ҳақида қарор чиқарган ва маҳкум бир йилдан сўнг қатл этилган.

Тарихий прецедент мавжудлигига қарамай, маҳкум аёлнинг ҳимояси АҚШ Конституциясига киритилган саккизинчи тузатишга фаол суянишни режалаштирмоқда. Ушбу конституциявий норма шафқатсиз ва ғайриоддий жазоларни қўллашни тўғридан-тўғри тақиқлайди. Адвокатлар ўлим ҳукмини иккинчи бор ижро этишга йўл қўймаслик учун мана шу ҳуқуқий важни илгари суришади.

Суҳбатдош ушбу шов-шувли иш атрофида воқеалар ривожининг бир нечта эҳтимолий вариантларини айтиб ўтди. Мумкин бўлган сценарийлар қаторида у расмий авф этиш, ҳукмни алмаштириш ёки қатл этишнинг янги уринишига суд тақиқини олишни тилга олди. Шунингдек, адвокатлар суд жараёнини штатда ҳокимият алмашгунга қадар атайлаб чўзиш тактикасини танлашлари ҳам мумкин.

Бундан олдин АҚШда фавқулодда вазиятлар хизмати диспетчери қатл пайтида омон қолган Криста Пайк ҳақидаги қўнғироқни ҳазил (пранк) деб ҳисоблагани хабар қилинган эди.