Вэнс урушдан воз кечиб, савдога ўтишга чақирди

Жей Ди Вэнс Украина ва Россия урушни тўхтатиб, савдо ва маданий алмашинувларга ўтиши лозимлигини таъкидлади.

АҚШ вице-президенти Жей Ди Вэнснинг айтишича, Украина ва Россия урушни тугатиб, ўзаро савдо ва маданий алоқаларни ривожлантириши керак. Унинг таъкидлашича, бундай ёндашув президент Дональд Трампнинг халқаро можароларга оид «асосий нуқтаи назарини» акс эттиради.

Вэнс Breitbart News журналисти Метю Бойл билан суҳбат давомида Трамп маъмурияти турли минтақалардаги урушларни тугатиш учун иқтисодий воситалардан фойдаланиши мумкинлигини айтди. У ҳозирда саккизта тинчлик келишуви амал қилаётганини қайд этди.

Вице-президентнинг таъкидлашича, тўққизинчи ва ўнинчи келишувлар устида ҳам ишлар олиб борилмоқда. Унинг сўзларига кўра, ўнинчи келишувга эришилиши Трампни Тинчлик бўйича Нобел мукофотига номзод сифатида кўрсатиш учун асос бўлади.

Вэнс президент Трампни «қатъий, бироқ шафқатсиз эмас» деб тавсифлади. Унинг айтишича, Трамп зўравонлик табиатини яхши тушунади ва томонлар уруш ўрнига бошқа йўлларни излаши керак деб ҳисоблайди.

«Нима учун бир-бирингизни ўлдиришни тўхтатиб, ўрнига савдо қилмайсиз? Нега руслар ва украинлар бир-бирини ўлдириш ўрнига савдо қилмайди, саёҳат қилмайди ва маданий алмашинув қилмайди? Бу унинг асосий қараши», — деди у.

Бу баёнот АҚШнинг янги тинчлик режаси ҳақидаги хабарлар фонида янгради. 19 ноябр куни АҚШ ОАВлари ҳужжат Россияга Донбасснинг тўлиқ берилишини назарда тутаётгани ҳақида ёзган эди.

Планда Украина армиясини икки баравар қисқартириш, қурол-яроқни чеклаш ва рус тилини иккинчи давлат тили сифатида тан олиш каби бандлар борлиги айтилмоқда. ОАВ маълумотларига кўра, президент Трамп ушбу ҳужжатни қўллаб-қувватлаган.