Венесуэладаги зилзила қурбонлари сони 3000 нафарга яқинлашди

Венесуэлада 25 июнь кечаси содир бўлган зилзилалар оқибатида ҳалок бўлганлар сони 2954 кишига етди, 16 592 киши жароҳат олди.

Бу ҳақда Боливар Республикаси Миллий Ассамблеяси президенти Хорхе Родригес маълум қилди.

Венесуэла Алоқа ва ахборот вазирлиги зилзила натижасида 856 та бино вайрон бўлганини маълум қилди.

Таъкидланишича, фалокат ҳудудига 3281 нафар халқаро қутқарувчи юборилган ва Каракас қутқарув ишлари учун 29 567 нафар ходимни сафарбар қилган.

Шунингдек, қутқарув гуруҳлари жамоат хавфсизлигини таъминлаш ва тикланиш ва қайта қуриш ишларини қўллаб-қувватлаш учун энг кўп зарар кўрган ҳудудларда иш олиб бораётгани таъкидланди.

Эслатиб ўтамиз, 25 июнь кечаси Венесуэла шимолида 7,1 магнитудали зилзила содир бўлди. Кейинчалик АҚШ Геологик хизмати 40 сония оралиғида 7,2 ва 7,5 магнитудали иккита зилзила содир бўлганини хабар қилди. Мамлакат расмийлари фавқулодда ҳолат эълон қилишди.