Венесуэла Миллий ассамблеяси амнистия тўғрисидаги қонунни қабул қилди

Венесуэла Миллий ассамблеяси пайшанба куни чекланган амнистия ҳақидаги қонун лойиҳасини маъқуллади. Унга кўра, амнистия фақат муайян намойишлар ва норозилик акциялари иштирокчиларига нисбатан қўлланади.

Аввалроқ расмийлар 1999 йилдан ҳозирги кунгача бўлган “бутун сиёсий зўравонлик даври”ни қамраб олувчи кенг кўламли амнистия лойиҳасини ваъда қилган эди.

Маҳаллий мустақил нашр Efecto Cocuyo аниқлик киритишича, қонуннинг якуний таҳририда 2002 йилдан 2025 йилгача бўлган 13 та намойишлар, норозиликлар ва иш ташлашлар каби воқеалар санаб ўтилган.

Қонунга мувофиқ, 2002 йилдаги муваффақиятсиз давлат тўнтариши иштирокчилари амнистиядан фойдаланиши мумкин. Шунингдек, амнистия 2016–2021 йилларда фаолият юритган Миллий ассамблея даврига ҳам татбиқ этилади. Ўша пайтда парламент мухолифат назоратида бўлган, Николас Мадуро бошчилигидаги ҳукумат эса унинг фаолиятини тўхтатган эди.

Reuters маълумотига кўра, қонунда айнан қайси жиноятлар амнистияга тушиши аниқ кўрсатиб ўтилмаган. Амнистия қўлланилмайдиган жиноятлар қаторига эса “хорижий давлатлар томонидан халқ, мамлакат суверенитети ва ҳудудий яхлитлигига қарши қуролли ҳаракатларга кўмаклашиш” ҳам киритилган.