Энергетика вазирлиги Ахборот хизматининг маълум қилишича, бугунги кунда мамлакатимизда умумий қуввати 4 119 МВт бўлган 11 та қуёш ҳамда 4 та шамол электр станцияси “яшил” энергия ишлаб чиқармоқда.
Кеча, 6 июль куни ҳолатига кўра, ушбу қуёш ва шамол электр станциялари томонидан 2025 йилнинг ўтган даврида ишлаб чиқарилган электр энергияси миқдори 5 млрд кВт⋅соатга етди.
Мазкур генерациянинг 3 млрд 125,4 млн кВт⋅соатлик қисми қуёш электр станциялари томонидан, 1 млрд 915,1 млн кВт⋅соатлик қисми эса шамол электр станциялари томонидан ишлаб чиқарилди.
Қолаверса, жорий йил бошидан бугун, 7 июль соат 08:00 га қадар Ўзбекистондаги барча гидроэлектр станциялар ва қуёш ҳамда шамол электр станциялар томонидан 8 млрд 736,9 млн кВт·соат электр энергияси ишлаб чиқарилди. Бу жорий йилдаги жами генерациянинг 20,3 фоизини ташкил қилади.
Бунинг натижасида:
➖ 2 млрд 647 млн куб метр табиий газ тежалишига эришилди;
➖ атмосферага 3 млн 879 минг тоннадан ортиқ зарарли газларнинг чиқиши олди олинди.
Маълумот учун: мазкур ҳажмдаги электр энергияси 7 млн 280 мингта хонадоннинг олти ойлик ёки 3 млн 640 мингта хонадоннинг бир йиллик меъёрий базасини ташкил қилади.
