Ўзбекистонда чегирмалар ҳақиқийлигини QR-код орқали текшириш имкони яратилиши мумкин

Ўзбекистонда харидорларга эълон қилинган чегирмаларнинг ҳақиқийлигини QR-код орқали текшириш имконини яратиш таклиф этилмоқда.

Бу ҳақда Рақобат қўмитаси маълум қилди».

Қайд этилишича, Қўмита 58 та савдо ва хизмат кўрсатиш шохобчасидаги 116 та акцияни ўрганиб, 65 та муаммо ва камчиликни аниқлаган. Айрим ҳолларда чегирмалар амалда бошқача қўлланилган, акция шартлари тўлиқ тушунтирилмаган ёки ғолибларга совринлар берилмаган.

Андижонда «Water Life Mineral» компанияси «Орзу ушалсин» акциясида уч нафар иштирокчига жами 60 миллион сўмлик совринларни топширмаган.

Наманганда эса Chevrolet Cobalt автомобилини ютиб олган фуқаронинг ғолиблиги бекор қилиниб, машина бошқа шахсга берилган. Компания буни ғолибнинг телефон рақами нотўғри терилгани билан изоҳлаган. Рақобат қўмитаси аралашувидан сўнг автомобиль ҳақиқий эгасига қайтарилган.

Намангандаги «Baldini» дўконида 50 фоизлик чегирма эълон қилинган, аммо маҳсулотларда нархномалар бўлмаган.

Бухородаги «IDEA» дўконида эса 20, 50 ва 60 фоизлик чегирмалар товарнинг умумий нархига эмас, балки бўлиб тўлашдаги ойлик тўловларга қўлланган.

Самарқандда автомобиль харид қилганларга маиший техника совға қилиш акцияси фақат 100 фоиз олдиндан тўлов қилган харидорларга татбиқ этилган.

Қўмита маълумотларига кўра, аниқланган 65 та камчиликнинг 59 таси, яъни 90,7 фоизи ҳуқуқий тушунтиришлар ва огоҳлантиришлардан кейин бартараф этилган.

Тўртта тадбиркорлик субъектига нисбатан иш қўзғатилиб, истеъмолчилар фойдасига 250 миллион сўмга яқин маблағ қайта ҳисоб-китоб қилинган.

Чегирманинг ҳақиқийлигини QR-код орқали текшириш мумкин бўлади. Рақобат қўмитаси таклиф этаётган рақамли механизмлар харидорларга:

• QR-код орқали товарнинг аввалги нархлари ва чегирма миқдорини текшириш;
• акция шартларини олдиндан электрон тизимда кўриш;
• маҳсулот нархининг ўзгариш тарихини кузатиш имконини бериши мумкин.

Бу орқали эълон қилинган чегирмаларнинг ҳақиқийлигини текшириш ва харидорларни чалғитувчи рекламаларнинг олдини олиш кўзда тутилмоқда.