Олий Мажлис Қонунчилик палатаси мажлисида «Бирлашган Миллатлар Ташкилотининг медиация натижасида эришилган халқаро келишув битимлари тўғрисидаги конвенциясига Ўзбекистон Республикасининг қўшилиши ҳақида»ги қонун лойиҳаси биринчи ўқишда кўриб чиқилди.
Ҳужжат билан Ўзбекистоннинг «Медиация бўйича Сингапур конвенцияси»га қўшилиши назарда тутилмоқда. Конвенция халқаро тижорий низолар бўйича медиация орқали эришилган келишувларни иштирокчи давлатларда тан олиш ва ижро этишнинг ягона ҳуқуқий механизмларини белгилайди.
Лойиҳада қайд этилишича, агар Ўзбекистон тадбиркори хорижий ҳамкори билан низони медиация орқали ҳал қилиб, келишувга эришса, мазкур келишувни Конвенция иштирокчиси бўлган бошқа давлатда ижро этиш тартиби анча енгиллашади.
Қонун лойиҳасида Конвенцияни қўллаш билан боғлиқ айрим шартлар ҳам назарда тутилган. Жумладан, Ўзбекистон Республикаси, давлат органи ёки давлат органи номидан ҳаракат қилувчи шахс тараф бўлган келишувларга Конвенция қоидаларини татбиқ этмаслик таклиф этилмоқда.
Шунингдек, Конвенция фақат келишув тарафлари уни ўзаро муносабатларига нисбатан қўллашга розилик билдирган тақдирдагина амал қилиши белгиланмоқда.
Мажлисда таъкидланишича, Конвенцияга қўшилиш мамлакатда медиация институтини ривожлантириш, халқаро тижорий низоларни қисқа муддат ва кам харажат билан ҳал этиш, тадбиркорларнинг ҳуқуқ ҳамда қонуний манфаатларини ишончли ҳимоя қилишга хизмат қилади.
Муҳокамалар якунлари бўйича қонун лойиҳаси депутатлар томонидан қабул қилинди.
Саудия Арабистони валиаҳд шаҳзодаси Трампни Эронга қарши бошқа ҳужумлар уюштирмасликка чақирди
Марказий Осиёда энг кўп олтин кимнинг қўлида жам бўлган?
Президент таътилдан уйига қайтаётганда автоҳалокатга учради
