Ўзбекистон Биринчи хоними инклюзив хайрия фестивалида иштирок этди

Ўзбекистон Биринчи хоними, “Замин” фонди Васийлик кенгаши раиси Зироат Мирзиёева инклюзив хайрия фестивалининг Янги йил тадбирларида иштирок этди.

Фестивал доирасида Халқаро инклюзив хаб талабаларининг ҳақиқий ҳаётий ҳикоялари асосида саҳналаштирилган «Ёруғлик овозлари» номли саҳна асари намойиш этилди. Спектакль жаз ижролари билан уйғунлашиб, меҳмонларда катта таассурот қолдирди. Шунингдек, «Яккаланишда» номли иммерсив кўргазма ташриф буюрувчиларга сукунат ва ички кечинмалар оламига шўнғиш имконини берди.

Тадбир давомида “Меҳрли мактаб” лойиҳаси педагоглари томонидан Янги йил ўйинчоқлари, табрикномалар ва билагузуклар тайёрлаш бўйича маҳорат дарслари ташкил этилди. Ушбу машғулотлар ижодий кўникмаларни ривожлантириш ҳамда ўзаро қўллаб-қувватлаш муҳитини мустаҳкамлашга хизмат қилди.

“Меҳрли почта” майдончасига ташриф буюрган Биринчи хоним узоқ муддат даволанаётган болаларга самимий ва илиқ тилакларини ёзиб қолдирди.