US Open. Ўзбекистоннинг биринчи рақамли теннисчиси мусобақани тарк этди

АҚШнинг Нью Йорк шаҳрида йилнинг энг сўнгги “Катта дубулға” турнири — US Open давом этмоқда. Ўзбекистонлик биринчи рақамли теннисчиси Мария Тимофеева (дунёнинг 86-ракеткаси) 1/32 финалда жаҳон рейтингида 20-ўринни эгаллаб турган белгиялик Элис Мертенсга қарши кортга чиқди.

1 соат 46 дақиқа давом этган баҳсда Тимофеева белгиялик теннисчисига 2:6, 6:7 ҳисобида имкониятни бой берди. Эйслар бўйича ўзбекистонлик ракетка устаси устунликка эришди — 2 га 0. Иккала спортчи ҳам уч мартадан қўшхатога йўл қўйди.

Мария Тимофеева 1/64 финалида словениялик Тамара Зиданшекни мағлуб этган ҳолда кейинги босқичга йўл олган эди. Энди Элис Мертенснинг 3-босқичдаги рақиби икки карра АҚШ очиқ чемпионати ғолиби япониялик Наоми Осака (13) ҳамда чехиялик Катерина Синиакова (42) ўртасидаги учрашувда аниқланади.

Маълумот учун, йилнинг сўнгги “Катта дубулға” турнирининг асосий даврасида қатнашаётган яна бир ўзбекистонлик спортчи Камилла Раҳимова (дунёнинг 92-ракеткаси) 2-босқичда жаҳон рейтингида 93-поғонани эгаллаб турган испаниялик Оксана Селеҳметевани 6:3, 6:0 ҳисобида таслим этди.

Энди ўзбекистонлик теннисчи 1/16 финалда жаҳоннинг биринчи рақамли теннисчиси, амалдаги US Open чемпиони, беларуслик Арина Сабаленкага қарши кортга чиқади.

Улар ўртасидаги беллашув 4 сентябрь куни Тошкент вақти билан соат 20:00 да бошланади. Бунга қадар ушбу теннисчилар ўзаро уч марта тўқнаш келган ва уларнинг барчасида беларуслик спортчининг қўли баланд келган.

АҚШ очиқ чемпионати мавсумдаги тўртинчи “Катта дубулға” турниридир. Мусобақа қаттиқ қопламали кортларда ўтказилмоқда ва 13 сентябрь куни якунланади. Турнирнинг умумий мукофот жамғармаси 108 миллион долларни ташкил этади.