“Уруш дам олмайди” – Зеленский Ғарб сукунатини танқид қилди

Қўшма Штатларнинг сукунати, дунёдаги бошқаларнинг сукунати Россия президенти Владимир Путинни фақат рағбатлантиради.

Бу ҳақда Украина раҳбари Владимир Зеленский республика ҳудудига берилган зарбага изоҳ берар экан, ўзининг Телеграм-каналида ёзди.

"Дунё дам олиш кунларига бориши мумкин, аммо уруш дам олиш кунлари ва иш кунларига қарамай давом этмоқда. Буни эътиборсиз қолдириб бўлмайди. Американинг, дунёдаги бошқаларнинг жим туриши Путинни фақат рағбатлантиради. Россия раҳбариятига ҳақиқатан ҳам кучли босим ўтказмасдан туриб, бу шафқатсизликни тўхтатиб бўлмайди," - деди Зеленский.

Унинг сўзларига кўра, бу масалада "аниқ санкциялар ёрдам беради." У АҚШ ва Европани қатъиятга чақирди.