Украинанинг ҳужумидан сўнг Россиянинг “Транснефть”компанияси Новороссийск портига нефт етказишни тўхтатди

Россиянинг “Транснефть” нефт қувурлари компанияси Новороссийск портига нефт етказишни тўхтатганини, вазият билан таниш икки манбага таяниб, Reuters хабар қилди. Шу билан бирга, агентликка кўра, “Транснефть” вакиллари бунга изоҳ беришдан бош тортган.

Бу орада президент Зеленский Украина Қуролли кучлари кечаси Россия ҳудудидаги “муайян нишонлар”га зарба бериш учун узоқ масофали “Нептун” ракеталаридан фойдаланганини айтди.

Аввалроқ Новороссийск шаҳри мэри Украина ҳужуми оқибатида “Черномортранснефть” компаниясига тегишли резервуар ва қайиқлар тўхташ жойи, контейнер терминали, “Шешхарис” юк ортиш комплексидаги нефт базаси ҳамда бир нечта турар-жой биноларига зарар етганини билдирган эди.