Украинанинг ҳали босиб олинмаган ҳудудлари Россияга берилмайди — АҚШ вице-президенти

Жей Ди Вэнс Fox News'га берган интервюсида Россия Украинада тинчлик ўрнатиш бўйича музокараларда “жуда катта талаблар” қўйганини айтди.

"Биз Москва жуда кўп нарса сўрашини билардик, чунки Россиянинг уруш ҳақидаги тасаввури уларнинг қўли баланд келаётганига асосланган. Аммо Россия ҳали ҳатто босиб ололмаган ҳудудларини унга беришларига умид қилмаслиги керак. Бу эса уларнинг дастлабки тинчлик режасига киритилган бандлардан биридир", – дея таъкидлади Вэнс.

Сиёсатчи Вашингтон Москва ўзининг биринчи таклифида "жуда кўп талабларни" илгари суршини кутганини, чунки музокаралар жараёни кўпинча шундай ўтишини айтиб ўтган.

Вице-президент Россия ва Украина томонлари тинчлик музокараларида қатнашиб, аниқ "тинчлик режалари"ни таклиф қилаётганини "ўсиш" деб атади. Шу билан бирга, у агар АҚШ "руслар музокараларда виждонан қатнашмаяпти" деб топса, музокаралардан чиқишини билдирди. Унинг таъкидлашича, Қўшма Штатлар Киев ҳукуматининг қулашини хоҳламайди, Украинанинг суверен давлат бўлиб қолишини истайди.

"Россия-Украина урушини ҳал қилишда “баъзи дипломатик ютуқлар бор” деб ҳисоблайман. Биз барқарор тинчликка эришиш учун бу томонларни яна бироз яқинлаштиришга ҳаракат қилишимиз керак. Биз ҳали бунга эришганимиз йўқ. Биз энди тараққиётга эриша олмаймиз, деган қарорга келмагунимизча, бу борада ишлашда давом этамиз. Агар шундай бўлса, биз музокараларни тарк кетамиз. Президент Доналд Трамп бу жараёндан чиқишимизни айтади. Менимча, бу ҳам Россиянинг, ҳам Украинанинг ҳам Қўшма Штатлар маслаҳати ва воситачилигисиз ёлғиз қолишини англатади", – дея фикр билдирди вице-президент.