Украиналиклар ва Шимолий Кореяликлар ўртасидаги биринчи жанг

Украина ҳарбийлари Россия-Украина урушида қатнашиш учун Россиянинг Курск вилоятига келган биринчи Шимолий Корея ҳарбийлари билан ҳарбий тўқнашувга киришди. Бу ҳақда 5 ноябрь куни Финанcиал Тимес газетаси Украина разведкасининг юқори мартабали ходимига таяниб хабар берди.

4 ноябрь куни КХДР ҳарбийлари билан тўқнашув ҳақида биринчи бўлиб Украина Миллий хавфсизлик ва мудофаа кенгаши қошидаги дезинформацияга қарши кураш маркази раҳбари Андрей Коваленко хабар берган эди. Унга кўра, Шимолий Корея ҳарбийлари Курск вилоятида «аллақачон ўққа тутилган».

Украина разведкасининг юқори мартабали ходими ФТга ҳарбий қаршилик мавжудлигини тасдиқлади, аммо батафсил маълумот беришдан бош тортди. У УҚК ва КХДР жангчилари ўртасидаги тўқнашув ҳақида ҳеч қандай аниқ маълумот бермади. Фақатгина у бу Курск вилоятида содир бўлганини, у ерда Украина кучлари август ойида бошланган операция давомида эгалланган ҳудуднинг бир қисмини эгаллаб турганини айтди.

Украина президенти Владимир Зеленский 4 ноябрь куни Украина разведкаси маълумотларига кўра, Курск вилоятида Шимолий Кореянинг 11 минг аскари борлигини айтди. Украина, АҚШ ва Жанубий Корея маълумотларига кўра, КХДР Россияга урушда қатнашиш учун 12 мингга яқин ҳарбий хизматчи, жумладан, 500 офицер ва уч генерални юборган. Россия ва Шимолий Корея Украина ва унинг иттифоқчилари маълумотларини тасдиқламаган.