Украина Хавфсизлик хизмати (СБУ) Киевда икки нафар Хитой Халқ Республикаси фуқаросини ҳибсга олди. Улар Украина мудофаа кучларининг «Нептун» ракета мажмуасига оид махфий ҳужжатларни Хитойга ноқонуний йўл билан олиб чиқишга уринаётганликда гумонланмоқда. Бу ҳақда СБУ расмий Телеграм-канали орқали маълум қилди.
СБУ хабарига кўра, ушланганлардан бири — Киевдаги техник олийгоҳлардан бирида ўқиган ва 2023 йилда академик қарздорлик сабабли ўқишдан чиқарилган 24 ёшли хитойлик собиқ талабадир. У олийгоҳдан ҳайдалганига қарамай, Киевда қолган.
Иккинчи гумонланувчи — унинг отаси бўлиб, у Хитойда доимий яшайди, аммо Украинага тез-тез келиб туриб, ўғлининг агентлик фаолиятини шахсан мувофиқлаштириб келган.
Тергов маълумотларига кўра, собиқ талабадан «Нептун» ракеталари ишлаб чиқарилишига оид техник ҳужжатларни топшириш талаб қилинган. У бу мақсадда украин ҳарбий соҳасида фаолият юритувчи шахсни вербовка қилишга уринган.
Ҳозирда иккала шахсга нисбатан жиноят иши очилган. Улар 15 йилгача озодликдан маҳрум этилиши ва мулки мусодара қилиниши мумкин.
СБУ бу ҳаракатни мамлакатнинг мудофаа салоҳияти ва давлат хавфсизлигига қарши жиддий таҳдид сифатида баҳоламоқда.
ЖЧ-2026 «тарихдаги энг ифлос мусобақа» бўлиши мумкин
Қозоғистонда 1 миллионга яқин сайғоқни отишга қарор қилишди
Мирзабек Холмедов янги лавозимга тайинланди
