Украина уруши: Ўлган деб ўйланган австралиялик фуқаро ҳозир тирик эканлиги маълум қилинди

Австралия маъмуриятининг хабар беришича, Россия томонидан Оскар Женкинс исмли фуқаронинг тирик эканлиги тасдиқланди. Австралия Бош вазири Энтони Албанесе, агар у асирга олинганидан сўнг ўлдирилгани ҳақидаги хабарлар тўғри чиқса, оғир оқибатлар бўлиши ҳақида огоҳлантирган эди.

Австралия Ташқи ишлар вазири Пенни Вонгнинг маълум қилишича, Украинада жанг қилаётган ва Россия кучлари томонидан асирга олинганидан сўнг ўлдирилган деб тахмин қилинган Австралия фуқароси ҳали ҳам тирик.

Декабрь ойида Оскар Женкинснинг рус аскарлари томонидан сўроқ қилинаётгани ва калтакланаётгани кўрсатилган видеотасвирлар тарқалди. Шундан сўнг, шу ойнинг бошида у асирга олингач ўлдирилгани ҳақида хабарлар пайдо бўлди.

Россия: Австралиялик "тирик ва қўлга олинган"

"Австралия ҳукумати Россиядан Оскар Женкинснинг тирик ва қўлга олинган ҳолда эканлигини тасдиқловчи маълумот олди," деди Вонг ўз баёнотида ва қўшимча қилди: "Биз ҳамон жаноб Женкинснинг ҳарбий асир сифатидаги аҳволи учун жиддий хавотирдамиз."

"Ҳукумат Россияни жаноб Женкинсни озод этишга чақирмоқда," деди Вонг.

"Агар Россия жаноб Женкинсга халқаро гуманитар қонунчилик бўйича унга тегишли бўлган ҳимояни таъминламаса, бизнинг жавобимиз қатъий бўлади," дея таъкидлади у.

"Биз Канберрада ва Москвада Россияга жаноб Женкинс ҳарбий асир эканлигини ва Россия унга халқаро гуманитар қонунчиликка мувофиқ, шу жумладан инсоний муносабатда бўлиши шартлигини аниқ етказдик."

Женкинснинг вафоти ҳақидаги хабарлар тасдиқланмаган

Шу ойнинг бошида Вонг Австралия ҳукумати Женкинснинг ўлдирилгани ҳақидаги хабарни тасдиқлаш устида ишлаётганини маълум қилган эди.

Женкинс рус кучлари томонидан ўлдирилган бўлиши мумкинлиги ҳақида хабар тарқалган пайтда, Австралия Бош вазири Энтони Албанесе унинг ҳукумати "иложи борича энг қатъий чораларни кўриши" ҳақида огоҳлантирган эди.

Ўшанда Москва Австралия ўз ташқи ишлар вазирлиги билан аниқ масалани кўтарганидан "хабарсиз" эканини, бироқ Украина билан жанг қилаётган хорижликлар Россия қўшинлари учун "қонуний нишон" эканлигини айтганди.