Украина бўйича тинчлик режаси 6 та бандга қисқартирилди

АҚШ президенти Дональд Трамп Украинага оид тинчлик режаси 28 та банддан 22 бандга қисқартирилганини маълум қилди. У бу ҳақда «Air Force One» бортида журналистлар билан суҳбатда маълумот берди.

Журналистлар Трампдан айрим республикачиларнинг «дастлабки 28 бандли лойиҳа Россия учун жуда қулай» эканлиги ҳақидаги танқидларига муносабат сўради.

«Бу режа эмас – концепция эди. Музокарада 28 банд кўриб чиқилди ва уни 22 тагaча қисқартиришди. Кўп бандлар бўйича ечим топилди ва улар жуда яхши ечимлар. Энди натижасини кўрамиз», – деди Трамп уларга жавобан.

Трамп Украина Россияга ҳудудий имтиёз бериши кераклигини яна бир бор такрорлади. У фронтдаги вазиятни мисол қилиб келтирди.

«Ҳаммаси бир йўналишда кетяпти. Бир неча ой ичида бу ерлар Россия томонидан барибир эгалланиши мумкин. Ёки сиз 50–60 минг одамни яна йўқотиб, урушни давом эттирмоқчимисиз? Ёхуд ҳозир ечим топмоқчимисиз?» – деди Трамп.

Қўшма Штатлар президентининг айтишича, махсус вакили Стивен Уиткофф келаси ҳафта Москвага бориб, Россия президенти Владимир Путин билан тинчлик режаси бўйича музокаралар олиб боради.

Президент шунингдек, музокараларда иштирок этаётган куёвларидан бири — Жаред Кушнер ҳам эҳтимол Москвага сафар қилиши мумкинлигини билдирди.

Эслатиб ўтамиз, 23 ноябрда Женевада АҚШ ва Украина делегациялари янгиланган тинчлик режасини тайёрлашди.

Financial Times нашрининг хабар беришича, режа 28 банддан 19 бандгача қисқартирилган.

ABC News эса лойиҳадан Украина Қуролли Кучлари сонини қисқартириш талаби ҳамда уруш давридаги ҳаракатлар учун тўлиқ амнистияни назарда тутувчи бандлар чиқариб ташлангани ҳақида ёзди.