Украина 800 млн, Газпром 5 млрд долларсиз қоладиган бўлди

Газпром Украина орқали газ транзитини тўхтатди. Реутерс ҳисоб-китобларига кўра, етказиб беришнинг тўхтатилиши Украинанинг транзитдан йилига 800 миллион долларга яқин, Газпром эса газ сотишдан 5 миллиард долларга яқин даромад йўқотишига олиб келади.

Газпром Украина орқали газ етказиб беришни тўхтатди. Бу ҳақда рус компанияси 1-январ, чоршанба куни Телеграмъдаги каналида маълум қилди.

Улар 2019-йил 30-декабрда “Газпром” ЁАЖ ва Украинанинг “Нафтогаз” НЖА ўртасида Россия газини ташишни ташкил этиш бўйича имзоланган шартнома ва икки мамлакат ГТС операторлари ўртасидаги ўзаро ҳамкорлик тўғрисидаги шартноманинг амал қилиш муддати тугаганини эслатди.

“Украина томонининг ушбу келишувларни узайтиришдан бир неча бор ва аниқ ифодаланган рад этиши туфайли “Газпром” 2025-йил 1-январдан бошлаб Украина ҳудуди орқали транзит учун газ етказиб беришнинг техник ва ҳуқуқий имкониятидан маҳрум бўлди”, — дея таъкидлади Россия компанияси.

Россия газининг Украина орқали транзити “миллий хавфсизлик манфаатлари учун” тўхтатилди, дея тасдиқлади Украина Энергетика вазирлиги. "Биз Россия газининг транзитини тўхтатдик, бу Россия бозорларини йўқотмоқда, у молиявий йўқотишларга дучор бўлади", деди Украина энергетика вазири Герман Галушченко.

Реутерс тахминларига кўра, етказиб беришнинг тўхтатилиши Украинанинг транзитдан йилига 800 миллион долларга яқин, Газпром эса газ сотишдан 5 миллиард долларга яқин даромадларини йўқотишига олиб келади.

2024-йилда Россия консерни ушбу йўналиш бўйлаб қарийб 15 миллиард куб метр ёқилғи етказиб берди, бу Европа Иттифоқидаги умумий истеъмолнинг 4,5 фоизини ташкил этди. Европа Иттифоқи транзитни тўхтатишга тайёрлигини эълон қилган бўлса-да, ҳамма давлатлар ҳам бу позицияни қўллаб-қувватламайди. Хусусан, Словакия Бош вазири Роберт Фитсо мамлакатда газ таъминоти тўхтаб қолгани сабабли газ инқирози юзага келишидан огоҳлантирди.