Польша бош вазири Дональд Туск 1 сентябрь куни Гданьскдаги Вестерплатте яриморолида Иккинчи жаҳон уруши бошланганининг 87 йиллигига бағишланган хотира тадбирларида нутқ сўзлади.

Туск 1939 йилда Вестерплаттеда Польша ҳимоячилари биринчи зарбани қабул қилгани билан Россиянинг Украинага қарши ҳозирги агрессияси ўртасида параллел ўтказди.

У Ғарбни ўтмишдаги хатоларни такрорламасликка чақириб, урушнинг кейинги даври ҳал қилувчи бўлиши мумкинлигидан огоҳлантирди.

«Яқин ойлар — бу куз ва келаётган қиш — нафақат Украинанинг мустақиллиги, балки Польша ва бутун эркин дунёнинг хавфсизлиги учун ҳам ҳал қилувчи бўлиши мумкин», — деди Туск.

Польша бош вазири Россияни урушни бошлаган ягона томон деб атаб, Украина ва НАТО можаро учун масъул эмаслигини таъкидлади. У Ғарб ўз кучига ва ишончли иттифоқларга таяниши кераклигини билдирди.

Туск, шунингдек, Финляндия, Латвия, Литва, Эстония, Руминия, Дания ва яқинда Германияда ҳам диверсия ҳаракатлари кузатилганини қайд этди.

У Европа пойтахтлари «ёвузлик қаршисида ҳеч ким ёлғиз қолмаслиги керак» деган хулосани англаб етишига умид билдирди.