Туркияда ёмғир оқибатида юз берган йўл-транспорт ҳодисаси 9 кишининг умрига зомин бўлди

Туркиянинг Ван вилоятида юк машинаси ва йўловчи микроавтобуси тўқнашиши оқибатида 9 киши ҳалок бўлди, яна 5 киши жароҳатланди.

Ҳодиса 7 ноябрь куни Ўзалп — Сарой автомобиль йўлида содир бўлган. Воқеа жойига полиция, жандармерия, қутқарувчилар ва тез тиббий ёрдам ходимлари етиб келган. Жароҳатланганлар шифохонага ётқизилган.

Ван вилояти губернатори Озан Балжининг маълум қилишича, ёмғир туфайли йўл сирпанчиқ бўлиб қолган. Ҳалок бўлганларнинг шахсини аниқлаш ишлари давом этмоқда.

Автоҳалокатдан сўнг йўлда транспорт ҳаракати вақтинча тўхтатилган. Кейинчалик хавфсизлик чоралари кўрилиб, автомобилларнинг назорат остида ҳаракатланишига рухсат берилган.