Газ “заправка”лар фаолияти вақтинча чекланиши мумкин

Ўзбекистонда совуқ об-ҳаво сабаб газ таъминотида чекловлар бўлиши мумкин. Бу ҳақда Энергетика вазирлиги хабар берди.

9−11 ноябрь кунлари Ўзбекистоннинг айрим ҳудудларида ҳаво ҳарорати пасайиб, ёмғир ва қор ёғиши кутилмоқда. Шу муносабат билан вазирлик энергия ресурслари таъминотида барқарорликни сақлаш чораларини кўрмоқда.

Ўзгидромет прогнозига кўра, ушбу кунларда шимолий ва тоғли ҳудудларда қор, бошқа жойларда эса ёмғир ёғади. Тунги ҳарорат шимолда -7 даражагача, мамлакатнинг бошқа айрим ҳудудларида -1…-2 даражагача пасайиши мумкин.

Айни пайтда Тошкент шаҳри ва бошқа ҳудудларда иситиш мавсумини бошлаш ишлари олиб борилмоқда.

Газ таъминотида аҳоли хонадонлари, мактаблар, боғчалар, шифохоналар ва бошқа ижтимоий объектларга устуворлик берилади.

“Зарурат туғилган тақдирда, мавсумий истеъмолчилар, жумладан, автомобилларга газ тўлдириш компрессор шохобчалари (АГТКШ) фаолияти вақтинча чекланиши мумкин”, - дейилган хабарда.

Бундай чекловлар ҳокимликлар билан келишилган ва тасдиқланган графиклар асосида жорий этилади. Истеъмолчилар чекловлар ҳақида олдиндан хабардор қилинади.

Вазирлик газ ёки электр таъминотида муаммоларга дуч келган фуқароларни туну кун фаолият юритадиган қуйидаги рақамлар орқали мурожаат қилишга чақирди:

1104 — газ босими ва таъминоти билан боғлиқ муаммолар;

104 — газ авария хизмати;

1154 — электр энергияси узилишлари ва тармоқдаги носозликлар.

Энергетика вазирлиги фуқароларни иситиш мавсумида хавфсизлик чораларига алоҳида эътибор қаратишга чақирди.