Туркияда эркакни пичоқлаган 13 ёшли бола Ўзбекистон фуқароси эмас – Бош консулхона

"13 ёшли ўзбекистонлик бола Туркияда одам ўлдиришга уринди" сарлавҳали хабар асоссиз бўлиб чиқди

2025 йил 26 август куни интернет тармоғида ва айрим мессенжерларда тарқалган “13 ёшар ўзбекистонлик бола Туркияда одам ўлдиришга уринди” сарлавҳали хабар асоссиз экани маълум қилинди.

Бош консулхона дипломатлари томонидан олиб борилган ўрганишлар натижасида қуйидагилар аниқланган:

• Воқеа 2025 йил 22 август куни Истанбул шаҳридан 521 км узоқликда жойлашган Аксарай вилоятида содир бўлган;

• Воқеа иштирокчилари орасида Ўзбекистон Республикаси фуқаролари йўқ, улар бошқа давлат фуқаролари ҳисобланади;

• Айбланувчи — 2012 йилда туғилган С.Т., жабрланувчи эса — 2000 йилда туғилган М.О.

Шу ўринда таъкидлаш жоизки, баъзан бошқа давлат фуқаролари томонидан содир этилган жиноятлар айрим оммавий ахборот воситаларида Ўзбекистон фуқароларига нисбат берилиши халқимизнинг халқаро имижига салбий таъсир кўрсатмоқда.

Бош консулхона ватандошларимизни маҳаллий қонунларга қатъий риоя қилишга ва фавқулодда ҳолатларда Консулхонага тезкор равишда мурожаат қилишга чақирмоқда.