Тўқаев Шольцни Россияни жанг майдонида мағлуб этиш мумкин деган фикрдан воз кечишга чақирди

Қозоғистон раҳбари Шольцни Хитойнинг тинчлик режасини қўллаб-қувватлашга чақирди.

Қозоғистон президенти Қосим-Жўмарт Тўқаев Германия канцлери Олаф Шольцни Россияни жанг майдонида мағлуб этиш мумкин деган фикрдан воз кечишга ва Хитойнинг Украина бўйича тинчлик режасини қўллаб-қувватлашга чақирди.

«Россияни ҳарбий маънода мағлуб этиб бўлмаслиги ҳақиқат», деди Тўқаев Остонада Шольцга.

«Урушнинг янада авж олиши бутун инсоният ва биринчи навбатда Россия-Украина можаросига алоқадор давлатлар учун тузатиб бўлмайдиган оқибатларга олиб келади», — дея қўшимча қилди у.

Шольц дипломатик жиҳатдан бу фикрга қўшилмади ва Германия Украинани Россия бостириб киргани учун қўллаб-қувватлашини айтди. «Мамлакат ўзини ҳимоя қилиши, ўз яхлитлиги ва суверенитетини ҳимоя қилиши учун шундай бўлди ва шундай бўлиб қолаверади», деди у.

DW нашрининг таъкидлашича, «Қозоғистон ўзининг собиқ совет хўжайини Россиянинг яқин иттифоқчиси бўлиб қолмоқда. Бироқ Остона ҳукумати можарода тарафкаш бўлмади ёки Москванинг Украинанинг айрим ҳудудларига даъволарини қўллаб-қувватламади».