Тўқаев Қозоғистон Конституциясини янгилаш ташаббуси шахсан унинг ўзига тегишли эканини маълум қилди

Президентнинг сўзларига кўра, 15 март куни бўлиб ўтадиган референдум Қозоғистон замонавий тарихида алоҳида ўрин эгаллаши мумкин.

Қосим-Жўмарт Тўқаевнинг таъкидлашича, таклиф этилаётган ўзгаришлар ҳокимиятдаги мувозанат тизимини кучайтиришга қаратилган.

Шунингдек, у “кулранг кардиналлар” деб аталувчи шахслар ва қарор қабул қилишнинг норасмий марказлари давлат институтлари ўрнини босмаслиги кераклигини айтди ва давлат тизимини босқичма-босқич ривожлантиришга қаратилган сиёсат ортга қайтмас жараёнга айланганини таъкидлади.

Аввалроқ Қозоғистон президенти Қосим-Жўмарт Тўқаев мамлакатда парламент ислоҳоти ўтказилишини эълон қилган эди. Ислоҳот доирасида Қозоғистон парламенти икки палатадан бир палатага айлантирилади ва Қурултой деб номланади. Унда 145 та депутатлик ўрни бўлади.

Бундан ташқари, Қозоғистонда вице-президент лавозими жорий қилинади. Уни президент парламент розилиги билан тайинлайди.