Трампнинг куёви қурмоқчи бўлган элита курорт Албанияда оммавий норозиликларга сабаб бўлди

Албания пойтахти Тирана шаҳрида минглаб намойишчилар бир ҳафтадан буён АҚШ президенти Дональд Трампнинг куёви Жаред Кушнер билан боғлиқ йирик қурилиш лойиҳасига қарши норозилик билдирмоқда.

Намойишларга Адриатика денгизи соҳилидаги қўриқланадиган ҳудудда қурилиш ишларининг бошланиши сабаб бўлди. Маҳаллий ҳукумат рухсати билан Жаред Кушнерга алоқадор компания ушбу ҳудудда ҳашаматли курорт мажмуаси барпо этишни режалаштирган.

Бироқ норозилик ҳаракати тез орада фақат қурилишга қарши акциядан сиёсий талабларга айланди. Намойишчилар лойиҳанинг бекор қилиниши билан бирга мамлакатни 13 йилдан бери бошқариб келаётган Бош вазир Эди Раманинг истеъфосини ҳам талаб қилмоқда.

Эди Рама ўтган ҳафта парламентда сўзга чиқиб, лойиҳа ҳали тўлиқ тасдиқланмаганини ва унинг атроф-муҳитга таъсири бўйича баҳолаш жараёни якунланмаганини айтди. Шунинг учун у намойишчиларнинг хавотирларини эрта деб баҳолади.

Намойиш иштирокчиси Сара Брегасининг Reuters агентлигига айтишича:

«Ҳукумат ҳам, мухолифат ҳам коррупцияга ботган. Иккаласи ҳам бу жараёнга аралашган ва биз нимадир ўзгаради деб умид қиляпмиз. Бу шунчалик катта миқёсдаги ва сиёсий партиялар иштирок этмаётган биринчи норозилик ҳаракатидир».

Яна бир иштирокчи Оргест Нока эса:

«Асосий мақсад — ҳукуматни алмаштириш. Мен парламентда бутунлай янги авлод сиёсатчиларини кўришни истайман», — деди.

Биринчи норозилик акциялари май ойи охирида бошланган. Ўшанда қурилиш компанияси ходимлари курорт қурилиши режалаштирилган қўриқланадиган соҳил ҳудудининг бир қисмини тўсиб қўйган ва денгиз бўйида булдозерлар пайдо бўлган.

Тўсиқлар ёнида намойишчилар билан хусусий қўриқлаш хизмати ходимлари ўртасида тўқнашувлар юз берган. Шундан кейин норозилик ҳаракати Тиранага кўчиб ўтди ва ҳукумат бинолари олдида оммавий акциялар бошланди.

Маълумотларга кўра, Жаред Кушнер ва унинг турмуш ўртоғи Иванка Трампнинг умумий бойлиги тахминан 740 миллион доллар деб баҳоланмоқда. Бу лойиҳа эса ҳозирда Албаниядаги энг баҳсли инвестиция ташаббусларидан бирига айланган.