Трамп томонидан эълон қилинган савдо божларининг жаҳон иқтисодиётига таъсири билан танишинг

Fitch агентлиги АҚШ президенти Доналд Трамп жорий этган бож тўловларидан кейин Хитойнинг кредит рейтингини A даражасига туширди. Шунингдек, агентлик Хитойнинг бу йилги ялпи ички маҳсулоти (ЯИМ) ўсиш кутилмасини 5% дан 4,4% га пасайтирди.

Бундан ташқари, жаҳон бозорида нефт нархлари кескин пасайишни бошлади. Brent навидаги нефтнинг бир бааррели баҳоси 7% га арзонлашиб, 19 мартдан бери илк бор 70 доллардан пастга тушди.

Трамп янги божлар ҳақида эълон қилганидан сўнг Қўшма Штатлардаги йирик технология компаниялари акцияларнинг қиймати ҳам пасаймоқда. Бу ҳолат АҚШ фонд бозори учун 2 триллион доллар йўқотишга сабаб бўлди.

Deutsche Bank долларга ишончнинг сўнишидан хавотирда.

Deutsche Bank мутахассислари АҚШ долларига бўлган ишонч инқирози юзага келиши мумкинлигидан хавотир билдиришди. Уларнинг фикрича, энди валюталар курсини белгилайдиган асосий омиллар ўз аҳамиятини йўқотади ва нархлар кескин ва ноаниқ равишда ўзгаради. Шуни таъкидлаш керакки, доллар аллақачон кўплаб асосий халқаро валюталарга нисбатан арзонлашиб улгурди.

АҚШ савдо вазири Ҳовард Лютник Вашингтон ўзининг савдо божларига жавоб қайтарган ҳар қандай мамлакатга нисбатан янада юқори тарифлар жорий этилишини маълум қилди. Эслатиб ўтамиз, аввалроқ Хитой ва Европа Иттифоқи Қўшма Штатларнинг савдо божларига қарши жавоб чоралари кўрилишини эълон қилган эди.