Трамп соатларни ўзгартиришни бекор қилишга қаршилик қилаётган сенаторнинг телефон рақамини эълон қилди

Дональд Трамп Арканзас аҳолисини республикачи сенатор Том Коттонга қўнғироқ қилишга чақирди ва унинг мобил рақами эканини айтган телефон рақамини очиқлади.

📱 Трамп Truth Social тармоғида: «Томга мобил телефонига қўнғироқ қилинг», — деб ёзиб, Арканзас аҳолисидан сенаторни қонун лойиҳасини қўллаб-қувватлашга кўндиришни сўради.

Коттон президент қўллаб-қувватлаётган доимий ёзги вақтга ўтиш қонун лойиҳасига қарши. Унинг фикрича, қишда доимий ёзги вақт жорий этилса, айрим ҳудудларда қуёш жуда кеч чиқади ва болалар мактабга қоронғида боришига тўғри келади.

🏛️ Қонун лойиҳаси июль ойида АҚШ Конгресси Вакиллар палатасида маъқулланган, аммо Сенатда қаршиликка учраган.

Трамп эса кечқурун ёруғ вақтнинг узайиши қишлоқ хўжалиги, спорт ва жиноятчиликка қарши кураш учун фойдали бўлишини таъкидламоқда. Президентнинг ўзи эса гольф ўйнаш учун кўпроқ вақт қолишини алоҳида айтган.

⚠️ Бироқ эълон қилинган рақам ҳақиқатан ҳам Коттонга тегишлими — ҳозирча аниқ эмас. Reuters журналистлари рақамга қўнғироқ қилганда, фақат тўлиб кетган овозли почтага тушган.