Трамп Россияга қарши санкцияларни кучайтириш ҳақидаги қонун лойиҳасини маъқуллади

Янги қонун лойиҳаси Россия нефть ва газини харид қилаётган давлатларга нисбатан иккиламчи санкциялар жорий этиш имконини беради.

АҚШ президенти Доналд Трамп Россияга қарши санкцияларни кучайтиришни назарда тутувчи қонун лойиҳасини маъқуллади. Бу ҳақда АҚШ сенатори Линдси Грехем маълум қилди.

Унинг сўзларига кўра, мазкур ҳужжат бўйича Сенатда овоз бериш келаси ҳафта бўлиб ўтиши режалаштирилган.

“Президент Доналд Трамп билан бир қатор масалалар юзасидан жуда самарали учрашувдан сўнг, у Россияга қарши санкциялар бўйича икки партиявий қонун лойиҳасига рухсат берди”, — деб ёзди Линдси Грехем Х (собиқ Twitter) ижтимоий тармоғидаги саҳифасида.

Аввалроқ сенатор Грехем ушбу қонун лойиҳаси Америка президентига Россия нефть ва газини харид қилаётган мамлакатларга нисбатан иккиламчи санкциялар ҳамда божлар жорий этиш ваколатини беришини таъкидлаган эди.

Мазкур ташаббус Россияга нисбатан босимни кучайтириш ҳамда унинг энергетика секторидан олинадиган даромадларини чеклашга қаратилган.