Мадуронинг ўғли отасининг ўғирлаб кетилишидан сўнг унга мурожаат қилди

"Ота, сиз оиламиздаги барчани кучли инсонларга айлантирдингиз. Биз, сиз қайтгунингча ўз бурчимизни бажаряпмиз. Ватанимиз ишончли қўлларда, дада", — дея таъкидлади Николас Мадуро Герра.

У, шунингдек, Делси Родригесни сўзсиз қўллаб-қувватлашини билдирди. "Менга ишонаверинг. Менинг оиламга ишонинг", – деди Николас Мадуро Герра.

Эслатиб ўтамиз, Венесуэланинг АҚШ томонидан қўлга олинган раҳбари Николас Мадуро ва унинг рафиқаси Силия Флорес Ню Йорк Жанубий округ федерал судининг дастлабки мажлисида барча айбловларни рад этди. Уларнинг иккисига ҳам «наркотерроризм» бўйича айблов қўйилган. Кейинги суд мажлиси 17 март кунига белгиланди.

Венесуэлада эса вице-президент Делси Родригес вақтинча давлат раҳбари сифатида қасамёд қабул қилди. Бундан бироз олдинроқ Доналд Трамп агар АҚШ билан ҳамкорликдан бош тортадиган бўлса, унга жиддий оқибатлар билан таҳдид қилганди. Бунга жавобан Родригес Қўшма Штатларни «тинч-тотув яшаш»га чақирган.