Трамп оиласига алоқадор компания Украинадаги уруш ҳудудига одамсимон роботларни юборди

АҚШ президенти Доналд Трампнинг оиласи билан боғлиқ бўлган "Foundation Future Industries" компанияси Украина ҳудудида антропоморф (одамсимон) роботларни синовдан ўтказишни бошлади. Бу ҳақда "РИА Новости" "CNBC" телеканали тақдим этган маълумотларга таяниб хабар бермоқда.

Олинган маълумотларга кўра, жорий йилнинг бошида компания Украинага "Phantom MK-1" русумли роботларнинг иккита тажриба нусхасини (прототипини) етказиб берган. Ишлаб чиқарувчи корхона мазкур жараённи ҳарбий ҳаракатлар кечаётган ҳудудларда одамсимон роботлардан фойдаланиш бўйича тарихдаги илк расмий ҳолат сифатида қайд этди.

Телеканалнинг аниқлик киритишича, синов жараёнлари асосан хавф даражаси юқори бўлган фронт чизиғида логистика ва таъминот вазифаларини бажаришга йўналтирилган. Компания раҳбари Санкает Патакнинг сўзларига кўра, Украинадаги амалиёт "MK-1" моделлари хавфли ҳудудларда юкларни муваффақиятли етказиб бера олишини исботлаган.

Шундай бўлса-да, мазкур қурилмалар ҳали оммавий тарзда жанг майдонига маҳсулот сифатида чиқарилишга тайёр эмас. Ғарб ОАВларининг ёзишича, "Phantom MK-1" модели бор-йўғи 20 килограмм атрофида юк ташиш имкониятига эга, қолаверса, унинг намликдан ҳимоя тизими ва аккумулятор қуввати анча чекланган. Шу сабабли, компания яқин вақт ичида Украинага мукаммаллаштирилган "Phantom 2" моделларини юборишни режалаштирмоқда.

Қайд этиш жоизки, "Foundation Future Industries" Пентагон билан ҳам алоқаларни кучайтиришни мақсад қилган. "The Next Web" нашри берган хабарга кўра, стартап ҳозирнинг ўзида АҚШ қуруқликдаги қўшинлари, ҳарбий-денгиз ва ҳарбий-ҳаво кучлари манфаатлари йўлидаги тадқиқотлар учун қиймати 24 миллион долларлик давлат буюртмаларини қўлга киритган.