"Трамп NATO ва Европага босимни янада кучайтириши, Путин эса бундан фойдаланиб қолиши мумкин"

Politico нашри манбаларига кўра, Брюсселдагилар ҳозирда Владимир Путин учун “имкониятлар ойнаси” очиқ деган фикрда.

"Бунинг икки сабабини келтириш мумкин. Биринчидан, АҚШда ҳокимият яна икки йил давомида Доналд Трампда бўлади, у эса сўнгги вақтларда NATO бўйича иттифоқчиларидан аразлаган ва уларни ҳимоя қилишига кафолат бермаяпти. Иккинчидан, Европа Иттифоқи мамлакатларининг ўз мудофаасини кучайтиришга қаратилган шошилинч чоралари режа бўйича фақат 2030 йилга бориб ҳақиқий натижаларни бериши мумкин", дея ёзмоқда Politico.

"Aгар республикачилар ноябр ойида АҚШ Конгрессига бўладиган сайловларда ёмон натижа кўрсатадиган бўлса, унда Трамп NATO ва Европага босимни янада кучайтириши, Путин эса бундан фойдаланиб қолиши мумкин", — деди нашр манбаларидан бири.

Европарламентнинг халқаро ишлар қўмитаси аъзоси Мика Аалтола Politico нашри билан суҳбатда тўғридан тўғри ҳужум эмас, балки қандайдир гибрид сценарий эҳтимоли кўпроқ эканини айтди. Масалан, Путин чегарадош ҳудудда провокация келтириб чиқариши ҳамда НАТОда бу провокация Бешинчи моддани фаоллаштириш масаласида бўлинишга олиб келишига умид қилиши мумкин. Шу тариқа, Кремл АҚШ билан тўғридан тўғри тўқнашувдан қочган ҳолда Украинанинг Европадаги иттифоқчиларига босим ўтказган бўларди.

Аалтоланинг сўзларига кўра, бу Болтиқбўйи денгизида ёки Артктика минтақасида дронлар қўллаган ҳолда қандайдир амалиёт ўтказиш бўлиши мумкин.

"Агар чегара орқали тўлақонли босқин амалга оширилмаса, АҚШ бундай вазиятда бу у қадар муҳим эмаслигини айтиши ва Яқин Шарқ билан бандлиги шароитида Европага Россия билан музокара олиб боришни таклиф қилиш билан чекланиши мумкин", — деди у.