Трамп: "Медведевнинг баёнотларидан кейин АҚШнинг иккита ядро сув ости кемаси керакли ҳудудга етиб келди"

Аввалроқ Президент Дональд Трамп буйруғи билан қайта жойлаштирилган АҚШнинг иккита ядро сув ости кемаси аллақачон белгиланган ҳудудга етиб борган.

Америка етакчиси бу ҳақда Бедминстердан (Нью-Жерси) Вашингтонга учишидан олдин журналистларга маълум қилган. "Улар аллақачон минтақада, бўлиши керак бўлган жойда" - деди Трамп.

Аввалроқ у Newsmax телеканалига берган интервьюсида сувости кемалари Россияга яқинроқ жойлаштирилишини таъкидлаган, бироқ уларнинг аниқ манзилини кўрсатишдан бош тортган эди. Оқ уй раҳбари ҳарбийларни қайта жойлаштириш қарорини Россия Федерацияси Хавфсизлик кенгаши раиси ўринбосари Дмитрий Медведевнинг кескин баёнотларига жавоб бериш зарурати билан изоҳлади.

28 июль куни Медведев Х ижтимоий тармоғида Трампни Россияга таҳдид қилиш ва ультиматум қўйиш уруш томон қадам ташлаш дегани ҳақида огоҳлантирган. Кейинроқ, 31 июль куни у Трампнинг Россия иқтисодиёти ҳақидаги сўзларига изоҳ берди ва “ўлик қўл” хавфини – буйруқбозлик занжири йўқ қилинган тақдирда автоматик ядро зарбаси тушунчасини эслади. "У юрган ўликлар ҳақидаги севимли фильмларини эслаб қолсин", деб ёзди Медведев Telegram-каналида.