Трамп маъмурияти Мартин Лютер Кингнинг ўлдирилишига доир ҳужжатларни махфийликдан чиқарди — Associated Press

1968 йилда инсон ҳуқуқлари ҳимоячиси Мартин Лютер Кингнинг ўлдирилиши билан боғлиқ 240 минг саҳифадан ортиқ ҳужжатлар АҚШ Миллий архивлар ва ҳужжатларни бошқариш бошқармаси сайтида эълон қилинди.

Associated Press'га кўра, мазкур ҳужжатлар 1977 йилда АҚШ Федерал қидирув бюроси (ФҚБ) томонидан тўпланган. Улар Кинг устидан кузатув, шунингдек, унинг ўлдирилишидан кейинги тергов натижаларини ўз ичига олади. Агентликнинг қайд этишича, ҳужжатлардан Марказий разведка бошқармаси (МРБ) Кингнинг уруш ва қашшоқликка қарши халқаро ҳаракатларда иштирокини диққат билан кузатгани маълум бўлади. Аммо ҳозирча бу ҳужжатлар унинг ўлдирилиши тафсилотларига аниқлик киритадими йўқми, номаълумлигича қолмоқда.

Мартин Лютер Кингнинг ҳозирда ҳаёт бўлган икки фарзанди — 63 ёшли Мартин Лютер Кинг III ва 62 ёшли Бернис Кинг бу воқеа “ўнлаб йиллар давомида жамоатчиликда катта қизиқиш уйғотиб келганини” айтишди. Улар мазкур масала шахсий аҳамиятга эга эканини таъкидлаб, эълон қилинган ҳужжатларга “тўлиқ тарихий контекстда” баҳо беришга чақиришди. Шунингдек, улар оиланинг аввалги позициясини такрорлаб, Мартин Лютер Кингни ўлдирганликда айбланган Жеймс Эрл Рей бу жиноятда ягона айбдор эмаслигини, ҳатто, эҳтимол, умуман айбдор бўлмаганини билдиришди.

Бернис Кинг ва Мартин Лютер Кинг III ўз баёнотларида АҚШ президенти Доналд Трамп номини тилга олишмаган. Бироқ Бернис Кинг ўзининг Instagram саҳифасида отасининг фотосуратини “Энди Эпштейн иши билан шуғулланинг” деган ёзув билан жойлаштирди.

Мартин Лютер Кинг 1968 йил 4 апрел куни Теннесси штатининг Мемфис шаҳрида ўлдирилган. Унинг ўлдирилишида Жеймс Эрл Рей айбланиб, 99 йилга озодликдан маҳрум этилган. Рей дастлаб ўз айбини тан олган, бироқ кейинчалик бу кўрсатмаларни беришга мажбурланганини айтган. У 1998 йилда вафот этгунига қадар ўзини айбсиз деб ҳисоблаган.