Трамп Гренландия билан боғлиқ вазият туфайли бир қатор Европа мамлакатларига божлар жорий қилди

Қўшма Штатлар Гренландиянинг эгалик ҳуқуқи бўйича низо туфайли бир нечта Европа давлатларига тарифларни оширмоқда.

АҚШ президенти Дональд Трамп бу ҳақда Truth Social ижтимоий медиа платформасида эълон қилди.

"Биз Дания ва барча Европа Иттифоқи мамлакатларига йиллар давомида тарифлар ёки бошқа бирон бир компенсация тўламасдан субсидиялар бериб келмоқдамиз. Энди Даниянинг қарздорликларини қоплаш вақти келди — дунё тинчлиги хавф остида! Хитой ва Россия Гренландияни хоҳлашади, Дания эса бу ҳақда ҳеч нарса қила олмайди", деб ёзган у.

Трампнинг сўзларига кўра, фақат у бошчилигидаги Қўшма Штатлар Гренландия суверенитетини ҳимоя қила олади. Шунингдек, у Европа давлатлари томонидан оролда ҳарбий фаолликнинг кучайиши "хавфли ўйин" ва Вашингтон учун хавф туғдиришини таъкидлади.

"Жорий йилнинг 1 февралидан бошлаб Вашингтон Дания, Норвегия, Швеция, Франция, Германия, Буюк Британия, Нидерландия ва Финляндияга тарифларни 10% гача, 1 июндан эса 25% гача оширади. Бу тарифлар Гренландияни якуний ва тўлиқ сотиб олиш бўйича келишувга эришилгунга қадар амал қилади", деб таъкидлади Америка етакчиси.