Трамп FIFA раҳбаридан АҚШ терма жамоаси ўйинчисининг дисквалификациясини бекор қилишни сўраганини тан олди

АҚШ президентининг сўзларига кўра, у Жанни Инфантинодан шунчаки қизил карточка бўйича қарорни қайта кўриб чиқишларини сўраган.

"Балогун — бизнинг энг яхши ўйинчимиз. У қизил карточка олди. Мен бунинг нима англатишини билмасдим, лекин кейин эшитдимки, бу кейинги ўйинда иштирок эта олмасликни билдираркан. Бу жудаям адолацизлик. Қандай қилиб уни ҳали ўйналмаган ўйин учун жазолаш мумкин? Мен FIFA'дан мазкур ҳолатни қайта кўриб чиқишни сўрадим", — деди Оқ уй раҳбари Овал кабинетда журналистларга.

"Мен бу эпизодни кўрдим. Бу ҳатто қоида бузилиши ҳам эмасди. Бу катта тезликда югуриб келиб, тасодифан бир-бирига урилиб кетган икки йигит эди", — дея қўшимча қилди АҚШ президенти.

Доналд Трамп АҚШ жамоасининг асосий ўйинчиси Фоларин Балогуннинг дисквалификациясини тўхтатиб туриш ҳақидаги FIFA қарорини "ҳақиқатан ҳам ажойиб" деб атади. Шунингдек, у ўша ўйинни бошқарган ҳакам, бразилиялик Рафаел Клауснинг холислигига шубҳа билдирди.

"Агар бу ҳакамнинг ўтмишига қарайдиган бўлсак, у бироз шубҳали шахс. Мен бундай дейишни хоҳламайман, чунки жанжал кўтаришни ёқтирмайман, лекин у ростдан ҳам шубҳа уйғотади", — деди Трамп.

Аввалроқ FIFA Балогуннинг Жаҳон чемпионатининг 1/16 финалида Босния ва Герцеговинага қарши ўйинда олган қизил карточкаси сабабли дисквалификациясини тўхтатиб туришга қарор қилган эди. Шу тариқа, у 7 июл куни Белгияга қарши бўлиб ўтадиган 1/8 финал ўйинида иштирок эта олади.

UEFA, шунингдек, дунёнинг бир қатор футболчи, мураббий ва футбол бўйича экспертлари FIFA нинг бу қарорини қоралаб чиқди.