Трамп Эронда "кўп пул" борлигини айтди

АҚШ президенти Доналд Трамп Яқин Шарқдаги ҳозирги муаммолар Эронда "кўп пул" пайдо бўлгани билан боғлиқлигини таъкидлади.

"Яқин Шарқда ҳозир тинчлантиришни талаб қиладиган кўп воқеалар содир бўлмоқда. Буларнинг барчаси юз берди, чунки Эрон, биласизки, илгари ҳеч кимга пул бермаган эди, чунки унда пул йўқ эди. Энди эса унинг пули кўп. Бундан кейин нима бўлишини кўрамиз," - деди Трамп журналистларга душанба куни Вашингтонга ташриф буюрган Исроил Бош вазири Бинямин Нетаняҳу билан нималар ҳақида суҳбатлашмоқчи экани тўғрисидаги саволга жавобан.

Нетаняҳу "дипломатия муваффақиятсизликка учраганда Эроннинг ядро объектларига зарба бериш масаласида Трамп билан ўзаро тушунишга эришмоқчи." У Вашингтон ва Теҳрон ўртасида ядро келишувига эришиш эҳтимоли паст деб ҳисоблайди. Бу ҳақда Axios портали Исроилнинг юқори лавозимли амалдорига асосланиб хабар берган.

Якшанба куни Эрон Ташқи ишлар вазирлиги раҳбари Аббос Аракчи Эронга қарши санкциялар бекор қилинган тақдирда мамлакат ядро дастури бўйича музокараларга тайёрлигини маълум қилди. Аракчи таъкидлашича, БМТ Низомига хилоф равишда куч ишлатиш билан таҳдид қилишни давом эттираётган АҚШ билан тўғридан-тўғри музокаралар ўтказишнинг маъноси йўқ. Шунга қарамай, Теҳрон билвосита музокаралар ўтказишга тайёр эканлигини билдирди.